අපේ රටේදී නම් මේ රටේදී වගේ පැණි රහ කන්න ලැබෙන්නේ නෑ
චීන පොඩිත්තෝ කියති

2016-03-01 11:32:00       841
feature-top
ලංකාවේ පරිසරය තවමත් දූෂණය වෙලා නැති එක ගැන සතුටුයි. අපේ රටේ පරිසරය නම් දූෂණය වෙලා.

අපිත් එක්ක බැලුවහම ලංකාවේ යාළුවන්ට නම් ඒ ගොල්ලන්ගේ අම්මලා තාත්තලා එක්ක ඉන්න හොඳ නිදහසක් තියෙනවා. අපිට ඉගෙන ගන්න තියෙන දේ ගොඩාක් වැඩියි. විශේෂ දක්ෂතාවලට හැම ළමයෙක්ම යායුතු නිසා හවස් වෙනකම් පාසලේ රැඳී සිටින්න වෙනවා. ඒ නිසා අපට නම් නිදහස හොඳටම අඩුයි.

අපට හිතන්නට බොහෝ දේවල් ඒ පුංචි වදන් තුළ ලියැවී තිබුණා. ඔවුහු අපටත් වඩා ගොඩාක් පුංචිම පුංචි දඟකාර මාධ්‍යවේදියෝ පිරිසක්. පසුගියදා අපේ රට බලන්නට ආවේ ගොඩාක් අත්දැකීම් මේ පුංචි ජීවිතවලට එක්කරගන්න හිතාගෙන. සතියක් ලංකාව පුරා ඇවිද්ද මේ පුංචි මාධ්‍යවේදි පිරිස පසුගියදා තම රටේ ගම් දොරවල් බලා ගියේ අපේ මාධ්‍ය ජීවිතයට ලියන්නට හිතන්නට ගොඩාක් දේ අපට ඉතිරි කරමින්.

ජියැං යුහා, වෑං හාකියු, ලී සියේ, ටෑං, ගැන් තියායු සහ චෙන්ග් යන අපට නුහුරු නම් ඇති පුංචිම පුංචි සිඟිත්තෝ දාහත් දෙනෙක් මේ නඩයට එකතු වූවා. චීනයේ උපන් මේ පුංචි මාධ්‍යවේදියෝ ටික පසුගියදා ලංකාවට ආවේ චීනයට අනාගත මාධ්‍යවේදීන් බිහිකරන පාසලක් වන චීනයේ ෂැංහයි ප්‍රාන්තයේ වූ 'Little Master' නම් වූ රජයේ පෙර පාසලෙන්. තවමත් කටේ කිරි සුවඳ නොගිය මේ පුංචි සිඟතතන් කොයි කාගෙත් අවධානයට ලක්වුණේ තවමත් ඔවුන් වයස අවුරුදු දහයටත් අඩු නිසයි. පුංචි වුණත් අනාගතය ගැන දඟකාර බලාපොරොත්තු ගොන්නක් මේ පුංචි හිත්මල් තුළ පොදි බැඳ ගත්තේ කෙදිනක හෝ තරුණ මාධ්‍යවේදීන් වීමේ එකම අභිලාෂයෙන්.

ලංකාවට ආ මේ පුංචි ජීවිත වඩාත් තීරණාත්මක වුයේ අපේ පුංචි පරිසරයෙන් ඒ පුංචි හිත්වලට හිතන්නට ගොඩාක් දේ ඉතිරි කර දුන් නිසයි. ලංකාවේ ජන ජීවිතය , අපේ දරුවන්ගේ අධ්‍යාපනය වගේම අපේ පරිසරයත් මේ ළපටි හිතුවිලි වෙනස් මඟකට යොමු කළා.

ඒ මේ ලෙසටයි. වයස අවුරුදු අටේ ගැන් තියායු ලංකාවේ ගහ කොළ නිල් අහස් තලේ දැක්කේ අමුතුම ආකාරයට.

''ලංකාවේ පරිසරය හරිම ලස්සනයි. මුහුද හරිම සුදුයි. ලංකාවේ හැමතැනම තියෙන්නේ කොළම කොළපාට ගස්කොළං. ලංකාවේ පරිසරය තවමත් දූෂණය වෙලා නැති එක ගැන සතුටුයි. අපේ රටේ පරිසරය නම් දූෂණය වෙලා. ලංකාවේ හැම තැනම බල්ලෝ පූසෝ හරක්. අපි ඒකට හරිම ආසයි. අපේ රටේ කොහේවත් මේ වගේ සත්තු දකින්න නැහැ. ඒකට නම් දුකයි.''

පුංචි ගැන් වගේම ඔහුගේ අනෙකුත් මාධ්‍ය යහළුවන්ද මේ ගමනේ දි අපේ පරිසරය ගැන හිතුවේ එවන් අදහස් ගොන්නකින් යුතුවයි.

'' අපේ රටේ නම් බලන බලන හැම පැත්තෙම තියෙන්නේ ලොකු බිල්ඩින්. ලංකාවේ එහෙම නැති එක හොඳයි කියලා හිතෙනවා. ලංකාවේ හොඳ නිදහසක් තියෙනවා. ඒත් ලංකාවේ ගමනාගමනය නම් හරිම මන්දගාමියි. ගමනක් යන්න ගියොත් මඟටම කාලය ගතවෙනවා.'' ඒ පුංචි ටෑං. පුංචි ටෑං ට පමණක් නොව අනෙකුත් යහළුවන්ද ඒ ආකාරයෙන්ම එහෙම හිතුණු වාර අනන්තලු.

මේ පුංචි සිඟිත්තෝ ලංකාවේ පරිසරයට ඇලුම් කළද ඔවුන්ගේ ළපටි හිත්වලට දැනෙන්නේ ලංකාවට වඩා ඔවුන්ගේ රට වසර විසි පහක් තිහක් ඉදිරියෙන් සිටින බවය. ලංකාවේ මීට වඩා භෞතිකමය වශයෙන් දියුණුවක් ඇතිවිය යුතු වුවත් එය සිදුවිය යුත්තේ පරිසරයට හානි නොවන ආකාරයට බවත් මේ පැටවුන්ගේ අදහස යි. ඒ ඔවුන්ම පැවසු අදහස් මිස ළපටි සිත් සතන්වලට කිසිවෙකු ඇතුළු කළ දේ නොවේ.

ජියැං, වෑං, ටෑං ලාගේ මේ සංචාරයට ලංකාවේ බොහෝ තැන්හි ක්ෂේත්‍ර චාරිකා රැසක් ඇතුළත් වුණා. සීගිරිය ඓතිහාසික ගල් පර්වතය, පින්නවල අලි අනාථාගාරය, මහනුවර දළදා මාලිගාව, කොස්ගම කැස්බෑ සංරක්ෂණ මධ්‍යස්ථානය, ගාල්ල බලකොටුව, පේරාදෙණි උද්භිද උද්‍යානය මෙන්ම අලුත්ගම ගාමිණි මධ්‍ය මහා විද්‍යාලයේ ප්‍රාථමිකයද ඒ චාරිකාවට ඇතුළත් වුණා. අපේ පුංචි පන්ති කාමර දුටු මේ පුංචි පැටවුන්ගේ දෙනෙත් විවර වූයේ මේ අයුරිනි.

''අපේ රටේ යාළුවන්ට වඩා ලංකාවේ යාළුවන්ට ගොඩාක් නිදහස තියෙනවා. අපිට ඉගෙන ගන්න තියෙන දේ ගොඩාක් වැඩියි. විශේෂ දක්ෂතාවලට හැම ළමයෙක්ම යායුතු නිසා හවස් වෙනකම් පාසලේ රැඳී සිටින්න වෙනවා. උදේ අටට ඉස්කෝලෙට ගියහම හවස 3.30 වෙනකම් පාසල තියෙනවා. ඊට පස්සේ රෑ හත අට වෙනකම් බාහිර දේ ඉගෙන ගන්නවා. අපිත් එක්ක බැලුවහම ලංකාවේ යාළුවන්ට හොඳ නිදහසක් තියෙනවා, ඒ ගොල්ලන්ගේ අම්මලා තාත්තලා එක්ක ඉන්න''. අපේ දරුවන් ගැන මේ පුංචි සිඟිත්තෝ එහෙම කිව්වත් මේ පුංචි හිත්වලට නම් අපේ දරුවන්ගේ පන්ති කාමර හිතට ඇල්ලුවේ නැහැ වගෙයි.

''මේ යාළුවන්ගේ පන්ති කාමර හරිම චූටියි. ඉගෙන ගන්න ඉඩ මදියිනේ. ගොඩක් යාළුවෝ එක පන්තියක පිරිලා. මේ අයට ලොකු බිල්ඩින් හදලා දෙන්නකෝ'' ඒ පැටවුන්ගේ පුංචි ඉල්ලීමක්.

සැමදා දැක තිබුණු තම මවට වඩා වෙනස් කාන්තා රූපයන් ලී සියේ මෙන්ම ඔහුගේ යහළුවන්ද දුටුවේ ලංකාවේදි ය. ගවුම හැට්ට සාය අඳින චීන කාන්තාවන්ට වඩා සාරි හැට්ට අඳින ලංකාවේ කතුන් මේ පුංචි සිතට ගෙන දුන්නේ නැවුම් අත්දැකීමකි.''ලංකාවේ ගෑනු සාරි ඇන්දහම හරිම ලස්සනයි.''

මිණිපුරේ මැණික් අසා තිබුණත් මේ දරුවන් එවා සියැසින්ම දැක්කේ මැණික් කෞතුකාගාරයෙනි.

''මෙච්චර ලස්සන මැණික් දැක්කේ අද තමයි. ලංකාවේ ලස්සන මැණික් තියෙනවා''

.ආගන්තුක සත්කාරයන් මේ පුංචි පැටවු ටික ඉගෙන ගත්තේ ලංකා සංචාරයේදී ය. දකින දකින කාගේත් සිත් ගත් මේ පුංචි පැටවුන්ට මදි නොකියන්නට සංග්‍රහ සත්කාර භුක්ති විඳින්නට ලැබුණා.

''ලංකාවේ යන යන හැම තැනින්ම කන්න බොන්න දෙනවා. මෙහෙ අයිස්ක්‍රීම් හරිම රසයි. අපේ රටේදි නම් පැණිරහ කෑම කන්න ලැබෙන්නේ නැහැ'' ජියැං, ටැං, සියැං වගේම හැම යාළුවෙක්ම එහෙම කිව්වා.

මේ පුංචි පැටවුන්ගේ ලංකා සංචාරය අපූරුවට සංවිධානය කළේ ලංකා ස්පෝර්ට්ස් රයිසන්ස් (LSR) ආයතනයයි. මේ ආයතනය වසරකට එක් වරක් නොව දෙවරක්ම මේ ආකාරයෙන් Little Master මාධ්‍ය පාසලේ දරුවන් ලංකාවට ගෙනෙන්නේ දැඩි කැපවීමකිනි. එම ආයතනයේ චීන සංචාරක අංශය සම්බන්ධ කළමනාකාර අධ්‍යක්ෂ චාමික දිසානායක මාමා වගේම එම ආයතනයේ ප්‍රධාන විධායක නිලධාරි ඩී. කේ. ආර් ධර්මපාල මාමාත් මේ පුංචි පැටවුන්ගේ සංචාරයට ගෙන දුන්නේ නොමඳ සහයකි.

'' අපි සෑම වසරකටම දෙවතාවක්ම මේ ආකාරයට මේ මාධ්‍ය හදාරන පාසලේ දරුවන් ගෙන්වා ගන්නවා ක්ෂේත්‍ර පුහුණුවක් වශයෙන්. මේ පුංචි දරුවන් පුංචි කාලයේ සිටන්ම තමන්ගේ අනාගතය ගැන තීන්දු තීරණ ගන්නා අය. මේ දරුවන් හැම දෙයක්ම දිහා බලලා තනියම අවබෝධ කර ගන්නවා. ලංකාව තුළ හැම පහසුකමක්ම අපි මේ අයට ලබා දුන්නා. මේ පුංචි චීන දරුවන් බෙන්තොට ගඟේ තනියම ඔරු පැද්දා. ජයග්‍රහණය කරන අයට අපි තෑගි දුන්නා. අපේ පාසල් දරුවන්ට නිදහස් අධ්‍යාපනය දීලා තියෙන එක ගැන මේ දරුවන් හරියට ප්‍රසංසා කළා. ඒත් පන්ති කාමර වල අඩු පහසුකම් ගැන කියමින් දුක්වුණා. මේ සංචාරයේදි අධ්‍යාපන අමාත්‍යාංශයත් බලන්න මේ දරුවන් ගිහින් අධ්‍යාපන ඇමැතිතුමාගෙන් තෑගි භෝගත් ලබා ගත්තා.'' ධර්මපාල මහතා පැවසුවා.

''මේ පුංචි පැටවු ලංකාවට ගෙන්වා ගැනීම සඳහා අපි විශාල වෙහෙසක් දරනවා ඒ දරුවන්ට පහසුකම් සලසන්නට. මේ අයට ලංකාවම ආවරණය වෙන ආකාරයට වැඩ සටහන් සකස් කළා. උදේ වරුවේ හැම දෙයක්ම බලාගත්තට පස්සේ හවස හෝටලයට ගිහින් මේ අය දැකපු දේ වලින් වාර්තාවක් හදනවා. පස්සේ ඒවා ගුරුවරුන්ට ඉදිරිපත් කරනවා. අවසානයේ හොඳම ඒවාට ඇගයුම් කාඩ් පතක් ලැබෙනවා.

ඒ වගේ වැඩිපුර ඇගයුම් ලබාගත් කෙනාට ඒ අය තෑගි දෙනවා. මේ දරුවන්ගේ භාෂා පරිවර්තකයා වුණේ ආසිරි සමන්ලාල් මහතා. ඔහු ප්‍රවීන භාෂා පරිවර්තකයෙක්. මේ දරුවන්ට හැම තැනක්ම කියා දුන්නේ ඔහුයි. අවසානයේදි ඔහුට වඩා හොඳට මේ දරුවන්ට ඒ තැන් ලස්සනට විස්තර කළ හැකි වුණා. මේ පුංචි දරුවන් ලංකාවේ හිටිය දවස් වල මේ වැඩ ඉවර කරලා නිදියගන්න කොට පාන්දර දෙක වෙනවා.'' චාමික පැවසුවේ දරුවන් දෙස ආදරයෙන් බලමින්.

''හැම දේම තනියම කර ගන්න නිසා මේ පුංචි දරුවන්ට සුවිශේෂි හැකියා තිබුණේ. අපේ දරුවන්ගේ පාසලකට ගියත් සිංදු කියන්න නටන්න වගේම සිංහලෙන් වචනයක් දෙකක් කතා කරන්නත් මේ සතිය තුළ මේ දරුවෝ ඉගෙන ගත්තා. මේ පුංචි පැටවු ටික එනකොට ඒ ඒ අයට පුළුවන් විදියට අපේ දරුවන්ට දෙන්න තෑගිත් අරගෙන ආවා. ස්වාධීන රූපවාහිනි ආයතනයට ගිහින් සජීවව වැඩ සටහන් පටිගත කරන ආකාරය ඉගෙන ගත්තා. මේ පාසලේ ප්‍රධාන විදුහල්පතිනිය චෑංග් මහත්මියයි. සිරිමාවෝ බණ්ඩාරණායක මැතිනිය චීනයට ගිය වෙලාවේ මල් කලඹක් දී එතුමිය එදා පිළිඅරගෙන තියෙන්නෙත් චෑංග් මහත්මියයි. ඒ වගේ දිගු ඉතිහාසයක් මේ අතර තියෙනවා'' ඒ භාෂා පරිවර්තක සමන් ලාල් මහතායි.

බොහෝ දෙනා රටකින් රටකට ගොස් විඳින්නේ එහි සුන්දරත්වය පමණි. ඉගෙන ගන්නා දේ මෙන්ම ග්‍රහණය කර ගන්නා දෑ අල්පය. ඒත් මේ පුංචි පැටවු ඊට හාත්පසින්ම වෙනස් ය. ඔවුන් මේ සංචාරයේදි බොහෝ දේ ඉගෙන ගත්තා පමණක් නොව නැවතත් සිය රටට ගියේ අපට බොහෝ දේ සිතන්නටද ඉතිරි කරමිනි.

Wmqgd .ekSu isK mqj;a m; weiqfrks

More News »